शारजा

शनिवारी शारजामध्ये झालेल्या सामन्यात दिल्ली कॅपिटल्सने चेन्नई सुपर किंग्जचा पाच विकेटनी पराभव केला. अखेरच्या षटकापर्यंत रंगलेल्या या सामन्यात दिल्लीच्या शिखर धवनने महत्त्वाची भूमिका पार पाडली. धवनने ५८ चेंडूत नाबाद १०१ धावा केल्या. तर अखेरच्या षटकात ५ चेंडूत ३ षटकारांसह २१ धावा करून अक्षर पटेलने विजय मिळवून दिला. अखेरच्या षटकात दिल्लीला विजयासाठी १७ धावांची गरज होती. अक्षरने रविंद्र जडेजाला ३ षटकार मारले.

या सामन्यात शिखर धवनने आयपीएल करिअरमधील पहिले शतक झळकावले. शिखरने आयपीएलच्या १६७ डावात पहिले शतक झळकावले. याआधी त्याच्या नावावर ३९ अर्धशतकांची नोंद आहे. अर्ध शतकांच्या बाबत तो सनरायजर्स हैदराबादचा कर्णधार डेव्हिड वॉर्नरनंतर दुसऱ्या क्रमांकावर आहे. 

आयपीएलमधील पहिल्या शतकासह शिखर धवनच्या नावावर एक अनोखा विक्रम झाला आहे. आयपीएलमध्ये सर्वाधिक डाव खेळल्यानंतर शतक करणाऱ्या यादीत शिखर अव्वल स्थानी पोहोचला आहे. त्याचे स्पर्धेतील पहिले शतक १६७व्या डावात आले. याआधी हा विक्रम विराट कोहलीच्या नावावर होता. विराटने पहिल्या शतकासाठी १२० डाव खेळले होते. तर अंबाती रायडूने ११९ आणि सुरेश रैनाने ८८व्या डावात पहिले शतक केले. 

सामन्यात चेन्नई सुपर किंग्जचा कर्णधार महेंद्र सिंह धोनीने नाणेफेक जिंकून प्रथम फंलदाजी करण्याचा निर्णय घेतला. चेन्नईने २० षटकात ४ बाद १७९ धावसंख्या उभी केली. त्यांच्याकडून फाफ ड्युपेसिसने ५८ तर रायडूने ४५ धावा केल्या. १८० धावांचे आव्हानात्मक टार्गेट दिल्लीने शिखरच्या अनुभवाच्या जोरावर पार केले. अखेरच्या षटकात अक्षर पटेलने धमाकेदार फलंदाजी करत विजय मिळवून दिला.