नवी दिल्ली

 अम्फान वादळानं पश्‍चिम बंगाल आणि ओडिशाला जोरदार तडाखा दिल्यानंतर या भागात एकच हाहाकार उडाला. आत्तापर्यंत या वादळात 80 जणांनी प्राण गमावल्याची माहिती मिळतेय. तसंच राज्यात जवळपास एक लाख कोटींचं नुकसान झाल्याचंही समोर येतंय. याच पार्श्‍वभूमीवर पंतप्रधान नरेंद्र मोदी हे आज पश्‍चिम बंगालची पाहणी करण्यासाठी दाखल झाले. पंतप्रधान नरेंद्र मोदींनी उद्ध्वस्त झालेल्या भागाची हवाई पाहणी केली. यावेळी त्यांच्यासोबत पश्‍चिम बंगालच्या मुख्यमंत्री ममता बॅनर्जी यादेखील उपस्थित होत्या. संकटाच्या या काळात आपण पश्‍चिम बंगालसोबत आहोत, असं पंतप्रधान नरेंद्र मोदींनी यावेळी म्हटलंय. याशिवाय केंद्राची एक टीम लवकरच राज्यात येऊन तपशीलात पाहणी करेल, असंही पंतप्रधानांनी स्पष्ट केलंय.

हवाई पाहणीनंतर पंतप्रधान नरेंद्र मोदींनी महाचक्रीवादळाचा फटका बसलेल्या नागरिकांच्या मदतीसाठी 1000 कोटी रुपयांच्या आर्थिक मदतीची घोषणा केलीय. याशिवाय मृतांच्या कुटुंबीयांनाही आर्थिक मदतीची घोषणा पंतप्रधानांनी केलीय. मृतांच्या कुटुंबीयांना 2 लाख रुपये मदत म्हणून देण्यात येणार आहे. याशिवाय जखमींना 50 हजार रुपयांची मदत केली जाणार आहे.

पश्‍चिम बंगाल करोना आणि अम्फान या दोन समस्यांशी एकाच वेळेस झुंज देत आहेत. जो जिथं आहे तिथंच त्यानं राहावं, हाच करोनाशी लढण्याचा मंत्र आहे. परंतु, वादळाशी लढण्याचा मंत्र म्हणजे लवकरात लवकर सुरक्षित स्थळ जाणं... दोन्ही अगदी विभिन्न लढाई पश्‍चिम बंगालला एकाच वेळेस लढावी लागतेय. यासाठी पश्‍चिम बंगालच्या मुख्यमंत्री ममता बॅनर्जी यांना हरएक मदत करेल, असं आश्‍वासन पंतप्रधान मोदींनी यावेळी दिलंय.

देशात करोना व्हायरसचं संकट आहे. याच वेळेत पूर्व भागाला अम्फान वादळाचा तडाखा बसला. राज्य आणि केंद्र सरकारनं मिळून या महाचक्रीवादळाला तोंड देण्याची तयारी केली होती. परंतु, त्यानंतरही 80 जणांचा जीव आम्ही वाचवू शकलो नाही. या चक्रीवादळात संपत्तीचंही मोठं नुकसान झालंय. यामध्ये घर आणि पायाभूत सुविधांचंही नुकसान झालंय, असंही यावेळी पंतप्रधान नरेंद्र मोदी यांनी म्हटलं.पश्‍चिम बंगालच्या नागरिकांना दिलासा देण्यासाठी आणि पुनर्वसनासाठी संपूर्ण प्रयत्न केले जातील. पश्‍चिम बंगाल लवकरात लवकर या समस्येतून बाहेर पडावं, अशी आम्हा सगळ्यांचीच इच्छा आहे, असंही पंतप्रधान नरेंद्र मोदींनी म्हटलंय.यापूर्वी, कोलकाता विमानतळावर पश्‍चिम बंगालच्या मुख्यमंत्री ममता बॅनर्जी, राज्याचे राज्यपाल जगदीप धनकड आणि अनेक केंद्रीय मंत्री पंतप्रधान नरेंद्र मोदींच्या स्वागतासाठी उपस्थित झाले होते.

अवश्य वाचा

आज पासून नवी सुरुवात!