नवी दिल्ली 

केंद्र सरकारने सोन्याच्या दागिन्यांची विक्री करण्यासाठी हॉलमार्क अनिवार्य केलं आहे. केंद्र सरकार यासंबंधी आदेश जारी करणार आहे. यासाठी सोने व्यापार्‍यांना एक वर्षांची मुदत देण्यात आली आहे. त्यामुळे 15 जानेवारी 2021 पासून फक्त हॉलमार्क असलेल्या सोन्याच्या दागिन्यांची विक्री करता येणार आहे. तसंच व्यापार्‍यांना केवळ 14, 18 आणि 22 कॅरेटच्या दागिन्यांचा हॉलमार्क असलेल्या वस्तू विकता येणार आहेत. या नियमाचं उल्लंघन केल्यास एक वर्षाच्या तुरुंगवासाची शिक्षा होऊ शकते. यासोबत दंडाचीही तरतूद करण्यात आली आहे.

केंद्रीय अन्न व सार्वजनिक वितरण मंत्री रामविलास पासवान यांनी दिलेल्या माहितीनुसार, 2021 पासून हॉलमार्क शिवाय सोन्याच्या दागिन्यांची विक्री होऊ शकणार नाही. सोने व्यापार्‍यांना जुने दागिने विकण्यासाठी एक वर्षाचा कालावधी देण्यात आला आहे. यादरम्यान सर्व व्यापार्‍यांना नोंदणी करावी लागणार आहे. हॉलमार्क बंधनकारक केल्यानंतर फसवणुकीला आळा घालण्यात मदत होईल असं रामविलास पासवान यांनी म्हटलं आहे. अनेक सोने व्यापारी 9 कॅरेटचा दागिना विकून 22 कॅरेटचे पैसे वसूल करतात. हॉलमार्क अनिवार्य केल्यानंतर फक्त 14, 18 आणि 22 कॅरेटच्या दागिन्यांची विक्री करण्याची परवानगी मिळणार आहे असंही त्यांनी सांगितलं आहे. तसंच जर कोणी सोने विक्रेता किंवा हॉलमार्क केंद्राने फसवणूक केली तर त्यांना एक लाख किंवा एकूण दागिन्यांच्या पाच पट दंड ठोठावला जाईल अशी माहिती त्यांनी दिली आहे.

हॉलमार्किंगसाठी सरकार सर्व शहरांमध्ये हॉलमार्किंग केंद्र सुरु करण्याची तयारी करत आहे. आतापर्यंत फक्त 234 शहरांमध्ये ही केंद्रं आहेत. लोक एक ठराविक फी भरुन दागिन्यांची तपासणी करुन घेऊ शकतात असं रामविलास पासवान यांनी सांगितलं आहे.

ज्या लोकांकडे जुने दागिने आहे त्यांचं कायत्यांनाही हॉलमार्किंग बंधनकारक असणार का? असं विचारलं असता रामविलास पासवान यांनी सांगितलं की, हा नियम फक्त सोने व्यापार्‍यांसाठी आहे. सामान्य नागरिक आपले दागिने हॉलमार्कच्या दागिन्यांसोबत बदलू शकतात. देशात जवळपास चार लाख सोने व्यापारी आहेत. आतापर्यंत 28 हजार 849 जणांनी नोंदणी केली आहे.

 

अवश्य वाचा

कलिंगडाची गोडी महागली