दुबई 

लॉकडाउनच्या काळात नोकरी गेल्याने सौदी अरेबियात रहात असलेल्या भारतीय कामगारांवर चक्क भीक मागण्याची वेळ आली. भीक मागणाऱ्या भारतीय कामगारांची रवानगी डिटेंन्श कॅम्पमध्ये करण्यात आली होती. या भारतीयांची सुटका करण्यात आली असून जवळपास ७०० भारतीय कामगार मायदेशी परतले आहेत. या भारतीयांना मायदेशी पाठवण्यासाठी मराठी उद्योजक धनंजय दातार यांनी पुढाकार घेतला. 

सौद अरेबियातील जेद्दाह शहरातील डिटेन्शन सेंटरमध्ये मागील चार महिन्यांपासून अडकले होते. बहुतांशी कामगारांचा काम करण्याच्या परवान्याची मुदत संपली आहे. नोकरी नसणे आणि परवान्याची मुदत संपणे या कारणांमुळे मिळेल ते काम करावे लागले. तर, बऱ्यात भारतीय कामगारांवर जवळील पैसे संपल्यामुळे भीक मागण्याची वेळ आली होती. स्थानिक नियम, कायद्याचे उल्लंघन झाल्यामुळे या भारतीय कामगारांना डिटेन्शन कॅम्पमध्ये डांबण्यात आले होते. त्यातील काही कामगारांचा व्हिडिओही समोर आला होता. अनेक कामगार ओढावलेल्या परिस्थितीमुळे पूर्णपणे हताश झाले आहेत. नोकरी गेल्यामुळे उत्पन्नाचे काहीच साधन नसल्यामुळे आम्हाला भीक मागावी लागत होती. या गुन्ह्यासाठी आम्हाला आता डिटेन्शन सेंटरमध्ये नेण्यात आले असल्याचे काही कामगारांनी सांगितले. पाकिस्तान, बांगलादेश, इंडोनेशिया आणि श्रीलंका या देशाच्या अधिकाऱ्यांनी त्यांच्या कामगारांना पुन्हा त्यांच्या देशात नेले असल्याचेही कामगारांनी सांगितले.

या भारतीय कामगारांबाबत माहिती समजल्यानंतर दुबईतील उद्योजक धनंजय दातार यांनी भारतीयांची मदत करण्याचा निर्णय घेतला. संयुक्त अरब अमिरात व सौदी अरेबिया हे वेगवेगळे देश असल्याने एका देशातून दुसरीकडे पाठपुरावा करण्याचे काम तितकेसे सोपे नव्हते. दातार यांनी दुबईतील भारतीय वाणिज्य दूतावासामार्फत जेद्दाहमधील भारतीय वाणिज्य दूतावासाशी संपर्क साधला. 

सौदी अरेबिया प्रशासनाचे सहकार्य, जेद्दाह येथील भारतीय वाणिज्य दूतावासाचे प्रयत्न आणि उद्योजक दातार यांनी केलेल्या पाठपुराव्यानंतर या कामगारांची सुटका करण्यात आली. भारत व सौदी अरेबियादरम्यान सध्या विमान वाहतूक बंद असल्याने सौदी प्रशासनाने आणखी सहकार्य करत या सर्व कामगारांना आपल्या ‘सौदीया एअरलाइन्स’ या अधिकृत विमानसेवेद्वारे भारतात दाखल केले. तर कामगारांची जेद्दाह विमानतळापर्यंत वाहतूक, वैद्यकीय तपासणी व खाण्या-पिण्याची पूर्ण जबाबदारी धनंजय दातार यांनी स्वतः सांभाळली. यातील ४५१ कामगार ‘सौदीया एअरलाइन्स’च्या २ विशेष विमानांमधून दिल्ली विमानतळावर तर उर्वरित २५० कामगार कोची विमानतळावर उतरले. दिल्लीत उतरलेल्या कामगारांना दिल्ली व भटिंडा येथे क्वारंटाईनमध्ये पाठवण्यात आले आहे.

आखाती देशांत अडकलेल्या निर्धन भारतीय कामगारांचा विमान प्रवास व वैद्यकीय चाचणीचा पूर्ण खर्च उचलून त्यांना सुखरुप मायदेशी पाठवण्याची मोहीम आम्ही राबवत आहोत. आमच्या 'अल अदील' समूहाच्या कंपनी सामाजिक जबाबदारी (सीएसआर) उपक्रमांतर्गत आतापर्यंत जवळपास ५००० गरजूंना मदत करून मायदेशी पाठवण्यात आले आहे. संकटाच्या काळात आपल्या बांधवांची मदत करणे हा माणुसकीचा व भारतीय संस्कृतीचाच एक भाग आहे. डिटेन्शन कॅम्पमधून भारतीयांना पुन्हा मायदेशी पाठवता आले याचे समाधान असल्याचे त्यांनी सांगितले

 

 

अवश्य वाचा

गर्भातील बाळाला दिले रक्त